Kryeministri, Ramush Haradinaj, thotë se ideja e ndryshimit të kufijve ka rrjedhë për të destabilizuar Ballkanin.

“Tito ka vra krejt elitën e Serbisë pas Luftës së Dytë Botërore, për të vendosur rendin që ai e ka dashtë. U pagu nji çmim i madh për këta kufij, me mbi një milion jetë. Mund të hapen çështjet e kufijve, por nuk do të arrijnë të përmbyllen ma,” është shprehur Haradinaj.

Ai kritikon edhe modelin e një republike të Dodikut, duke theksuar faktin se nuk do t’i kontribuonte serbëve të Kosovës.

“Nëse kemi një instrument të Putinit në Kosovë, çka i ndihmojmë serbëve? I ndihmojmë tre ose katër serbëve që mund jetë si derë e Putinit. Ideja e Dodikut është qëllimi me ta lënë një jofunksionalitet të brendshëm në një periudhë më afatgjate,” vlerëson Haradinaj.

Ai nuk ka informacione të qarta se çfarë do të qojë përpara Uashingtoni, së bashku me Berlinin dhe Parisin.

“ShBA ka tregu se ka energji dhe ka gatishmëri me ecë në çështjen e një marrëveshjeje. Me energjinë e re në Berlin dhe Paris, duhet ta shohim se si do të vazhdojë procesi i deleguar nga Uashingtoni,” është shprehur Haradinaj.

Sipas tij, Kosova tashmë ka Platformën e Dialogut dhe Ekipin Negociator, dhe këta të fundit duhet të jenë të pranishëm në Samitin e Parisit.

Këto komente ai i ka bërë në tryezën me temën “Dialogu Kosovë-Serbi pas Samitit të Berlinit” e organizuar nga Instituti Demokratik i Kosovës./arbresh.info/